Најавите од Англија дека на Евертон може да му бидат одземени дури 12 бодови за прекршување на финансискиот фер плеј, го налутија некогашниот играч на Ливерпул, а сега аналитичар на телевизијата „Скај“, Џејми Карагер.
„Премиер лигата бара одземање 12 бода на Евертон само за еден прекршок. Ако одиме така, Манчестер сити треба да се најде во Националната лига север. Против нив има 114 вакви случаи за кои се обвинети, но некако тивко е“, напиша Карагер.
Одлуката во овој случај се очекува на крајот на годината, а доколку се докажат прекршоците кои му се ставаат на товар на Евертон, на Карамелите им претстои многу сериозна казна.
Премиер лигата предложи казната да биде максимална, на клубот да му бидат одземени дури 12 бода, што би била рекордна казна. Евертон има рекордни загуби во изминатите три години од 371,8 милиони фунти, што е за 105 милиони повеќе од границите на дозволеното од Премиер лигата.
