Некогашниот фудбалер на Ливерпул, а сега телевизиски коментатор и аналитичар, Џејми Карагер, има многу пофални зборови за менаџерот на Манчестер сити, Пеп Гвардиола.
„Манчестер сити се доближува до тројната круна, а останатите премиерлигаши се соочуваат со непријатна реалност. Додека Гвардиола е на чело на Сити, останатите ќе се борат само за второ место“, смета Карагер.
Граѓаните в недела играат дома со Челзи и ако победат, ќе ја освојат третата титула по ред во англиската Премиер лига, а ќе бидат први фаворити и за титулата во следната сезона.
„Иако беа предизвикани од Арсенал сезонава, никој не е ни блиску до Сити. Тешко дека некој тим летово ќе се засили толку што ќе може да дојде на нивно ниво. Велат дека главната причина за доминацијата е шеикот Мансур, но се потценува визијата на Гвардиола. Тој изгради тим што постојано дава квалитет на терен каков што не сме виделе претходно. Победата над Реал Мадрид е последна од серијата убедливи победи против главните ривали“, додава Карагер.
