Поранешниот фудбалер, а сега ТВ-експерт, Џејми Карагер, се изјасни против идејата странец да ја води англиската репрезентација по заминувањето на селекторот Герет Саутгејт.
„Веќе имавме странци во репрезентацијата, работев со нив. Тоа беа Свен-Горан Ериксон и Фабио Капело и не беше многу кул. Не е прашање да се добие најдобриот клупски тренер бидејќи клупскиот фудбал е сосема поинаков. Мислам дека Клоп или Гвардиола нема да направат разлика за нас. Ние сме Англија, репрезентацијата треба да ја тренира англиски селектор“, убеден е Карагер.
Меѓу главните претенденти за наследници на Саутгејт се спомнуваат Греам Потер и Еди Хау, а токму Хау, кој е актуелен тренер на Њукасл, е фаворит на Карагер.
Договорот на Хау со Њукасл е до 2027 година, но тешко дека ќе ја одбие можноста доколку добие понуда да стане селектор на Англија.
Потер импресионираше за три години на чело во Брајтон, потоа неговата репутација претрпе удар кога беше отпуштен од Челзи по помалку од седум месеци на чело на Сините, но останува еден од најпочитуваните тренери во англискиот фудбал.
