Италијанскиот калчолигаш Милан подготвува понуда за играчот од средниот ред на Порто, Алан Варела, открија медиумите на Апенините. Идејата на Росонерите е да се засилат со борбениот играч од средината на теренот во текот на летото.
Во оваа зона, стандардни играчи во тимот на Сержо Консеисао се Тијани Рејндерс и Јусуф Фофана. Јунус Муса номинално е играч од централниот дел во средниот ред, но често игра на десната страна, додека Исмаел Бенасер постојано се бори со повреди и не успева да се врати во оптимална форма.
Главниот фактор за интересот на Милан кон Варела е тренерот Консеисао, кој одлично ги познава квалитетите на 23-годишниот Аргентинец од времето кога работеше со него во Порто.
Друга трансферна цел на Милан е играчот од средниот ред на Торино, Самуеле Ричи. Но, за неговиот потпис конкуренција е Интер, кој исто така го следи внимателно и сака да го доведе по завршувањето на сезоната.
