Тренерот на Милан, Сержо Консеисао, отворено ја призна слабата игра на својот тим во второто полувреме од финалето на Купот на Италија, каде што Росонерите загубија со 0-1 од Болоња. Иако изрази незадоволство од некои судиски одлуки, посебно од моментот кога судијата Маурицио Маријани не му покажа втор жолт картон на Луис Фергусон по дуелот со Кристијан Пулишиќ, Консеисао беше јасен дека не сака да бара алиби.
„Првото полувреме беше изедначено, имавме неколку шанси за водство – а тоа е клучно во вакви натпревари. Признавам, можевме да направиме многу повеќе во второто полувреме“, рече Консеисао. „Болоња имаше среќа при голот, но не сакам да го потценам нивниот успех – одиграа одлично и заслужено го освоија трофејот.“
Поразот е голем удар за Милан, кој неодамна ја победи Болоња со 3-1 во Серија А. Сега, по ова финале, Милан ризикува да остане без место во европските натпреварувања следната сезона.
„Во недела играме против Рома, тоа е клучен меч. Жал ми е за навивачите, нивната поддршка беше феноменална, но сега се разочарани. Овие натпревари се решаваат со детали – тие искористија една шанса, ние не“, додаде стратегот на Росонерите.
