Кошаркарите на Пелистер ја остварија првата историска победа во ФИБА Европа купот, совладувајќи го тимот на Приевидза со резултат 90-83 во натпреварот од второто коло на ова натпреварување.
Ова беше воедно и првиот европски меч одигран во битолската сала „Боро Чурлевски“, па иако трибините не беа целосно исполнети, битолчани имаа совршена вечер.
Гостите од Словачка го отворија натпреварот подобро и водеа во првата четвртина, со највисока предност од 16-22. По првите десет минути, резултатот беше 18-22. Приевидза продолжи во добар ритам и во вториот период имаше контрола над резултатот, но Пелистер успеа да направи серија од 8-0 и да поведе, па на полувреме се замина со минимални 41-40.
Во второто полувреме, избраниците на Александар Даскаловски стартуваа моќно. По 44-44, направија серија од 12-0 и изградија значителна предност. Тие ја одржаа контролата и во последната четвртина влегоа со резултат 68-56.
Во завршницата, Пелистер повторно започна силно и ја зголеми предноста до 81-61, но потоа следуваше пад во играта. Со серија грешки на домашните, Приевидза се врати и ја намали разликата на само 81-79. Тогаш, со четири клучни поени на Никола Малешевиќ, битолчани ја задржаа предноста и стигнаа до заслужена победа.
Остин Прајс беше најдобар стрелец на натпреварот со 25 поени, додека Никола Малешевиќ постигна 18. Во таборот на Приевидза, најистакнат беше Џо Тусант со 24 поени.
