Реал Мадрид успешно го започна настапот во новата сезона од Купот на Кралот, обезбедувајќи пласман во осминафиналето по победата на гостувањето кај третолигашот Талавера со 2-3.
Иако Чаби Алонсо изведе силен состав, дуелот понуди можност и за ротации. Килијан Мбапе доби целосна минутажа, додека од првата минута настапија и Хаусен и Арда Ѓулер. Во второто полувреме во игра влегоа и Белингам, Родриго и Чуамени.
Кралевите го скршија отпорот на домаќинот во финишот од првиот дел. По една спорна ситуација, Реал доби пенал кој Мбапе го претвори во водство во 41-та минута, а во судиското продолжение несреќно реагираше Фарандо, кој ја затресе сопствената мрежа за 0-2.
Талавера во второто полувреме успеа да ја врати неизвесноста со погодокот на Аројо, но брзо следуваше одговор од Реал. Во 88-та минута Мбапе со својот втор гол на мечот практично го реши прашањето за победникот. Сепак, домаќините не се предадоа и преку Ди Ренцо во финишот го ублажија поразот.
Алавес ја искористи домашната предност и со гол од пенал на Висенте ја елиминира Севиља со минимални 1-0.
