Претседателот на Реал Мадрид, Флорентино Перес, подготви 100 милиони фунти за трансферот на англискиот репрезентативец Џад Белингам, кој настапува за Борусија Дортмунд, објави „Сан“, а потоа и останатите англиски медиуми ја потврдија веста.
Трансферот би требало да биде реализиран на крајот од сезоната и медиумите пишуваат дека Реал Мадрид поради богатата понуда, има предност пред Ливерпул, кој исто така пројавува голем интерес за англискиот репрезентативец.
„Главната цел на Реал е да го донесе Белингам во Мадрид. Тој треба да им се приклучи на младите играчи на Реал, кои играат на средината на теренот. Ерата на Каземиро, Лука Модриќ и Тони Крос се ближи кон крајот, поради што Реал сака да го освежи и да го засили средниот ред“, пишува „Сан“.
Каземиро во летниот преоден рок си замина од Реал и се пресели во Манчестер јунајтед, додека Модриќ и Крос би можеле да си заминат од „Сантијаго Бернабеу“ на крајот од сезоната.
Тренерот на Реал, Карло Анчелоти, смета дека Белингам ќе биде идеална замена за Модриќ и Крос.
Белингам, кој има само 19 години, во Борусија дојде во 2020 година од Бирмингам, а за германскиот тим досега одигра 112 натпревари и постигна 19 голови. За репрезентацијата на Англија одигра 22 натпревари, а постигна еден гол на штотуку завршеното Светско првенство.
