Претседателот на Реал Мадрид, Флорентино Перес, денеска во рок од неколку часа договори неколку потписи со клучни играчи на Кралевите.
Прв кој се согласи да остане во Реал Мадрид и следната сезона е Тони Крос, кој треба да ја има улогата на ментор на младите ѕвезди на Кралевите, како Арда Ѓулер и Ендрик.
Само неколку часа по веста дека Крос е договорен за следната сезона, шпанските медиуми објавија дека Перес се договорил да ја продолжи соработката со уште двајца клучни играчи, тоа се Лукас Васкес и Начо.
На продолжување на договорите со Крос, Начо и Лукас Васкес инсистирал тренерот Карло Анчелоти, кој го убедил Перес дека тројцата искусни фудбалери би требало да имаат клучна улога во соблекувалната и на теренот и следната сезона, како и да им бидат ментори на неколкумината млади фудбалери кои во иднина сите ги гледаат како лидери на Реал.
Според шпанските медиуми, понуда за нов едногодишен договор добил и Лука Модриќ, но Хрватот треба да се согласи на помала плата и на помала минутажа, а по завршување на договорот идното лето би останал во клубот како помошник на Карло Анчелоти.
