Квалификациите за пласман на Светското првенство во 2026 година се во полн ек во Јужна Америка. Таму се играат дуелите од 13-тото коло, а сè појасно е дека една култна репрезентација нема да биде дел од планетарниот собир.
Тоа е селекцијата на Чиле. Ова е земја која била учесник на првото Светско првенство во 1930 година, а вкупно деветпати била дел од планетарните завршници. Сепак, во овие квалификации Чиле игра ужасно, а ноќеска загуби со 1:0 од Парагвај.
По 13 кола е на последното место во квалификациите во Јужна Америка само со девет бода и сега има мали шанси да се бори за место на завршницата. По зголемувањето на бројот на учесници на Мундијалот, од Јужна Америка директно одат најдобрите шест селекции, а седмата игра бараж.
Моментално на седмото место е Боливија со 13 бода, што значи дека Чиле уште има шанси, но, сепак, ако продолжи со лоши резултати, тешко дека ќе игра на Мундијалот следната година.
Инаку, во последните 10 години Чиле двапати беше првак на Јужна Америка, во 2015 и 2016 година.
