Роналд Куман беше претставен како нов тренер на фудбалскиот клуб Барселона. Куман е петтиот Холанѓанец кој ќе ја води Барса, по: Ринус Михелс, Јохан Кројф, Луис ван Хал и Франк Рајкард. Договорот со Каталонците му е до 2022 година.
Тој потпиша договор заедно со претседателот Хосеп Марија Бертомеу, а потоа замина на теренот на „Камп ноу“ и седна на тренерската клупа, на која ќе треба да седи во следните две години. Со ова на Куман му се исполни сонот да биде тренер на клубот на којшто во 1992 година со свој гол од слободен удар во финалето против Сампдорија му ја донесе првата европска титула. И тогаш тренер на Барса беше Холанѓанец, славниот Кројф.
