Кога ќе се разиграат Леброн Џејмс и Ентони Дејвис, Лос Анџелес лејкерс најчесто победува. Така беше и ноќеска, кога тимот од ЛА го победи Шарлот на гости со 124:118. Ова беше 27-ма победа за Лејкерс сезонава и останува во трка за место кое води во плејофот.
Џејмс го заврши мечот со 26 поени, 4 скока и седум асистенции, додека Дејвис имаше трипл-дабл со 26 поени, 15 скока и 11 асистенции.
Гостите беа многу поуспешни ноќеска и се радуваа на четири од шесте средби. И вториот тим од ЛА, Клиперс се радуваа, и тоа на гости кај Атланта со 144:118. Далас славеше на теренот во Филаделфија со 118:102 во меч на кој Кајри Ирвинг постигна 23 поени и осум асистенции, додека Лука Дончиќ застана „само“ на 19 поени и осум скока.
Голден стејт предводен од Стеф Кари, кој заврши со 29 поени, и Куминга, кој застана на 28 поени, го победи Бруклин во Њујорк со 109:98. Домашниот терен единствено го искористија Њу Орлеанс против Торонто и победи со 138:100, како и Кливленд, кој беше убедлив против Сакраменто и победи со 136:110.
