Некогашниот македонски ракометен селектор Лино Червар во својата богата кариера има освоено многу вредни медали. Сепак, пред Червар и неговата сопруга Клаудија е најважната битка. Клаудија има рак и заедно со својот Лино ја водат битката наречена живот.
Червар синоќа по 183 пат беше на клупата на Хрватска и ја предводеше до нова победа, овојпат над Црна Гора од 34:22. „Коцкестите“ се подготвуваат за Светското првенство, а Червар покрај фокусот на ракометниот терен, постојано мисли и на својата жена, со која е 44 години во брак.
„Мојата Клаудија е болна. Досега помина две операции и покажа дека е голем борец. Никогаш нема да го заборавам моментот кога тргна на првата операција. Застана на скалите пред куќата, се насмевна и ми рече: „Лино, јас ќе се борам. Ќе го освоиме и овој медал.“ Полна е со верба и тоа го пренесува на сите нас. Со Божја помош се надевам дека ќе успееме“, изјави Червар.
Во богатата тренерска кариера Червар бил тренер на шест клубови (меѓу кои и Металург), а седел на клупата на три репрезентации (беше и македонски селектор).Има освоено многу медали, а бил светскии олимписки првак со Хрватска.
