Ливерпул убаво се подмлади, ќе го затвори летниот пазар со најдобриот млад играч во Шкотска

Калвин Рамзи од Абердин ќе биде последното летно засилување на Ливерпул, а шкотскиот тинејџер со познато фудбалско презиме ќе му се приклучи на англискиот гигант од следната година и ќе игра најмалку уште шест месеци за шкотскиот клуб.

Рамзи е десен бек и има само 18 години, а според договорот меѓу Ливерпул и Абердин што се очекува да биде финализиран во следните денови, тинејџерот ќе остане да игра во Првата шкотска лига и во 2023 година.

Калвин беше прогласен за најдобар млад играч на сезоната во Шкотска во изборот на новинарите.

За него Ливерпул ќе плати 4 милиони фунти, а со дополнителни бонуси трансферот може вкупно да чини околу 6,5 милиони фунти.

Најавено е дека ова ќе биде и последниот трансфер на Црвените во летниот преоден рок.

Претходно на „Енфилд роуд“ пристигнаа Фабио Карвалјо од Фулам за сума од 10 милиони евра со вклучени бонуси и најголемото засилување, Дарвин Нуњес од Бенфика за сума од 75 милиони евра, што може да достигне максимум од 100 милиони евра со предвидените бонуси.

Карвалјо има 19 години и одигра прекрасна сезона за Фулам во Чемпионшип, а Нуњес е 22-годишник со фантастични настапи за Бенфика и постигнати 34 гола во сезоната што заврши во дресот на португалскиот гигант.