Ракометната репрезентација на Македонија ќе мора по потешкиот пат да се обиде да обезбеди место на Светското првенство кое следната година ќе се игра во Египет. Неуспехот на ЕП во Австрија и пласманот на 15-тото место значеше и подолг процес на Македонија за да стигне до Мундијалот.
Македонија ќе мора да одигра два баражи и тоа едниот во април и јуни, за да се обезбеди билет за планетарниот собир. ЕХФ денеска објави дека Европа ќе има 14 преставници во Египет. Светскиот првак Данска веќе има сигурен билет, а истото ќе го добијат и најдобрите три селекции од ЕП кое се игра во моментов.
Првата рунда на квалификации ќе биде во април, каде се Турција, Израел, Литванија и Романија, кои како победници ги завршија претквалификациските турнири. На овие четири екипи ќе им се приклучат учесниците на ЕП 2020 кои нема да обезбедат олимписки квалификации. Првата рунда квалификации за СП ќе се игра на 15/16, односно 18/19 април 2020. Ждрепката ќе се изврши на 30 јануари во Виена.
Норвешка, Франција, Германија, Шведска, Хрватска и Шпанија веќе имаат обезбедено ЛОИ квалификации според ранкингот на СП 2019 година, а доколку некој од нив стане европскои првак тогаш неговото место ќе го пополнат Бразил или Египет. Одтаму седум или осум европски репрезентации ќе гледаме во ЛОИ квалификациите, а останатите ќе играат квалификации за СП.
Репрезентациите кои ќе играат ЛОИ квалификации, имаат обезбеден директен пласман во втората фаза од квалификациите за СП, односно баражите во јуни (5/7 и 9/11 јуни) каде ќе им се приклучат победниците од првите баражи во април, а од нивните меѓусебни дуели подобрите ќе дојдат до мундијалски билет.