Германски Мајнц официјално го наименува Данецот Бо Свенсон (41) за главен тренер на првиот тим. Свенсон од 2007 до 2014 година беше член на Мајнц и во тие седум сезони му беше соиграч на македонскиот интернационалец Николче Новески, кој е легенда на Мајнц. Во тој период тренери на Мајнц беа Јирген Клоп и Томас Тухел, па ако Свенсон научил нешто од нив, можеби и ќе има успех.
По завршувањето на играчката кариера, Свесон работеше во школата на Мајнц, а во 2019 стана тренер на австрискиот второлигаш Лиферинг, кој е сателит на Ред Бул Салцбург.
Со назначувањето на Свенсон, Мајнц го доби дури четвртиот тренер од почетокот на сезонава. Тимот ја стартуваше сезонава во Бундеслигата под раководство на Ахим Баерлорцер, кој беше ослободен по првите два меча. Беше наследен од Јан-Мориц Лихте, кој по 8 порази на 12 меча беше избркан во декември. Во неделата, при поразот од Баерн, екипата ја водеше привремениот тренер Јан Зиверт.
Мајнц има само една победа во 14 кола и се наоѓа на претпоследното место на табелата. Дебито на Свенсон ќе биде в сабота, против Ајнтрахт.
