Фудбалската репрезентација на Македонија се врати на првото место на табелата во групата Ј, откако во петтото коло од квалификациите за СП 2026 ја совлада селекцијата на Лихтенштајн со убедливи 5-0.
Избраниците на Благоја Милевски уште од стартот покажаа дека на „Тодор Проески“ бараат само победа. Во 15. минута Елиф Елмас со фантастична соло-акција елиминира четворица противници и со прецизен удар ја затресе мрежата на гостите.
До крајот на првото полувреме Македонија имаше уште неколку прилики, преку Елмас и Трајковски, но голманот Бухел успеа да спаси.
На почетокот од вториот дел капитенот Енис Барди со силен удар најави погодоци, а во 52. минута токму тој ја зголеми предноста на 2-0 по одлична акција на Бојан Илиевски. Само четири минути подоцна и Дарко Чурлинов се запиша во листата на стрелците за 3-0. До крајот, и Лирим Ќамили успеа да погоди за водство од 4-0, а серијата ја затвори Лука Станковски.
Селекторот Милевски во финишот направи неколку ротации, а дебитанти во официјален квалификациски меч беа Елмин Растодер и Решат Рамадани, додека шанса добија и Лирим Ќамили, Милан Ристовски и Лука Станковски.
Македонија со оваа победа ги потврди амбициите за висок пласман и продолжува со силно темпо кон завршницата на квалификациите. Сега се наоѓа на првата позиција во групата со 11 бода.
