Кошаркарската репрезентација на Македонија дојде до многу тешка, но значајна победа на гостувањето кај Ирска, која на крајот беше изразена и со убедливи +12 поени, односно 76-88.
Сепак, почетокот и воопшто текот на мечот воопшто не навестуваа ваков епилог. Ирска започна одлично и до пред самиот крај на полувремето постојано имаше предност, на моменти и од 11 поени разлика.
Македонија првпат дојде во водство во самиот финиш од втората четвртина, кога поведовме со 37-40, а на паузата се замина со наше водство од 40-42. Во третиот период двете репрезентации се менуваа во водство, а се до самиот финиш на мечот беше тесно, а прашањето околу победникот непознато.
Нашите кошаркари клучната предност ја направија во последните две минути, кога со серија од 9-0 се одлепивме од 74-77 на 74-86, па до крајот веќе се беше полесно.
Андреј Јакимовски со 26 поени беше најефикасен поединец во нашите редови. Го следеше Џејкоб Вајли со 20 поени, а двоцифрени беа и Адем Мекиќ (12) и Војдан Стојановски (11).
