Во Торонто, Канада, утринава се одржа ММА приредбата УФЦ 297 во која главна борба беше таа за титулата во средна категорија (до 84 килограми) и на која победи предизвикувачот.
По пет возбудливи рунди, Јужноафриканецот Дрикус Ду Плесис на поени го победи шампионот Шон Стрикленд кој остана без шампионскиот појас уште во првата одбрана.
https://twitter.com/i/status/1748958169433350271
Двајца судии му дадоа предност на Ду Плесис и петте рунди ги бодуваа 48-47 во корист на Јужноафриканецот, додека еден му даде предност на Стрикленд (47-48).
Со победата, Дрикус Ду Плесис стана првиот УФЦ шампион од Јужна Африка и уште во откагонот го прозва поранешниот шампион во оваа категорија, Израел Адесања, со кого имаше вербални дуели изминатата година.
https://twitter.com/i/status/1748960791053664574
Ова воедно беше седма победа во седмиот настап на Ду Плесис во УФЦ, а последниот пораз го доживеа во 2018 година кога во организацијата КСВ беше совладан од Хрватот Роберто Солдиќ.
Фановите на Стрикленд, за виновник за поразот го прогласија најголемиот малер меѓу обложувачите, раперот Дрејк. Имено, само неколку часа пред почетокот на приредбата, Дрејк на социјалните мрежи се пофали дека уплатил 700.000 долари на победа на Стрикленд.
Во останарите борби, Ракел Пенингтон со едногласна одлука на судиите ја победи Бразилката Мајра Буенно Силва и стана шампионка во категоријата бантам (до 61 килограм).
Мовсар Јевлојев со едногласна одлука на судиите го победи Арнолд Ален во категоријата до 66 килограми, додека ветеранот Нил Магни со нокаут во третата рунда го победи Мајк Мелот во велтер.
Следната голема приредба во УФЦ ќе се одржи на 17 февруари кога Австралиецот со македонско потекло, Александар Волкановски ќе ја брани титулата во перолесна категорија против Илја Топурија.
