Роберто Манчини вели дека е среќен што е селектор на оваа генерација италијански фудбалери, со кои стаса до финалето на Европското првенство и посака Аѕурите утре на „Вембли“ да го направат и последниот чекор до втората континентална круна.
Првата ја освоија пред 57 години, а потоа загубија две финалиња, во 2000 и во 2012 година. Англичаните утре од 21 часот ќе играат за својата прва европска титула во првото финале за нив на ЕП.
„Стасавме далеку најмногу поради карактерот што го има оваа генерација италијански фудбалери. Покажавме неверијатна сплотеност, единство, сите дадоа и повеќе од максимумот и сега ни остана само последниот чекор. Да победиме и потоа да одиме среќни на заслужен одмор“, изјави Манчини.
Селекторот на Аѕурите го пофали ривалот, велејќи дека речиси и немаат слаба точка, па очекува убаво финале и вторат титула за Италија.
„Иако немаат европска титула, Англија е фудбалски гигант. Можеби имаа и пехови во минатото, но сџега се комплетна селекција и на физички и на тактички план. Ќе треба да уживаме на терен, како и досега, а се надевам дека италијанскиот дух, квалитет и атмосфера ќе не донесат на посакуваното место“, додаде Манчини.
Финалето ќе се игра на „Вембли“ во Лондон, утре од 21 часот.
