Аргентинската фудбалска ѕвезда Лионел Меси доби суспензија од еден натпревар, откако одлучи да не настапи на ол-стар дуелот на МЛС против селекцијата на играчи од мексиканскиот шампионат, и покрај тоа што беше здрав и подготвен за игра.
Заедно со соиграчот Жорди Алба, Меси го прескокна спектаклот во средата, што беше причина лигата да реагира. Според официјалните правила, играч кој нема дозвола од лигата, а сепак го избегнува настапот на ол-стар натпреварот, автоматски се казнува со недостапност за следниот меч од лигашката програма.
Тоа значи дека Меси ќе мора да го пропушти важниот натпревар против Синсинати овој викенд, екипа која се наоѓа на врвот на табелата во Источната конференција. И покрај тоа, Аргентинецот има одлична сезона зад себе, со 18 постигнати голови во досегашниот тек од шампионатот.
