Во денешното опширно интервју на Лионел Меси, Аргентинецот говореше и за неговиот долгогодишен ривал Кристијано Роналдо, кој сега ги брани боите на Јувентус. Меси вели дека му недостасува да го гледа Кристијано како ги „решета“ мрежите во Ла Лига, а би сакал да се сретне со Јувентус во овогодишното финале од Лигата на шампионите.
„Ми недостасува Роналдо. Ми беше мило што го гледав додека играше во Шпанија, колку и да беше болно што освојуваше толку многу трофеи. Сакав да остане во оваа лига. Кон Јувентус имам голем респект, а уште повеќе ги почитувам откако Кристијано го облече нивниот дрес. Се надевам дека ќе се сретнеме во финалето од Лигата на шампионите, па што биде нека биде“, истакна Меси.
Двете најголеми фудбалски ѕвезди во моментов бројат вкупно 10 Златни топки, Меси и Роналдо се рекордери со по пет. Што се однесува за пехари од ЛШ, Роналдо има пет, додека Меси има три.
Барселона во четвртфиналето ќе се соочи со Манчестер јунајтед, додека Јувентус закажа двомеч со Ајакс.
