Македонскиот репрезентативец Бојан Миовски и официјално потпиша за Глазгов Ренџерс и во следните четири сезони ќе го носи дресот на славниот шкотски клуб. По една година мината во Шпанија, штипјанецот се враќа во земјата каде веќе остави силен печат во дресот на Абердин.
Миовски денес имаше исполнета агенда, по слетувањето во Глазгов беше претставен пред јавноста, одработи прв тренинг со новите соиграчи и ја даде својата прва изјава за клупскиот сајт.
„Многу сум среќен што ќе бидам дел од овој тим. Бев возбуден кога ја добив понудата, бидејќи добро го познавам клубот и неговата историја. Поминав две одлични години во Абердин и драго ми е што повторно сум во Шкотска. Ќе се обидам да постигнам многу голови, да освојам трофеи и да им донесам радост на навивачите“, изјави македонскиот репрезентативец, кој потсети дека веќе знае како е да се игра против Ренџерс и Селтик.
Ренџерс утре го игра првото дерби „Олд Фирм“ против Селтик во новата сезона, а Миовски има големи шанси да дебитира во стартниот состав.
