Тренерот на Евертон, искусниот Дејвид Мојс, е разочаран по поразот на неговиот тим на гостувањето на „Енфиод роуд“ од Ливерпул. Големото градско дерби беше решено со еден потег, еден гол, а Мојс смета дека тој е од нерегуларна позиција.
Се играше 57-мата минута кога Диого Жота одлично се снајде и ја затресе мрежата на Евертон за голема радост на домашните фанови. Сепак, останува спорен моментот дека само секунда-две пред Жота да ја добие топката, асистентот Луис Дијас беше во офсајд при една топка која беше наменета за него, но беше „пресечена“, па потоа Колумбиецот се вклучи во акцијата и асистираше за голот кој донесе три бода за Ливерпул.
„Ливерпул доминираше на теренот, ја имаше контролата на топката, но и ние имавме свои шанси, кои, за жал, не ги искористивме. Уште пред мечот реков дека на вакви средби мора да се искористат шансите. Друг проблем беше тоа што во акцијата по која Жота го постигна голот, имаше офсајд. Едноставно само требаше судијата да го подигне знаменцето за офсајд бидејќи ситуацијата беше јасна. Ја гледав ситуацијата и на повторена снимка и за мене тоа е чист офсајд“, вели Мојс, чиј тим ја прекина убавата низа од девет меча без пораз.
