Патрик Беверли беше немоќен против брилијантниот Крис Пол и очигледно фруструиран од клучниот пораз на Лос Анџелес клиперс против Феникс санс со 103:130, го нападна ривалот од зад грб, грубо го турна и потоа беше исклучен.
Еден од најдобрите дефанзивци во НБА-лигата не можеше никако да го сопре 37-годишниот ветеран на Сонцата, кој постигна 41 поен, па реагираше неспортски.
Pat Bev lost his mind https://t.co/cjcSfH1MNb
— gifdsports (@gifdsports) July 1, 2021
Феникс лесно го доби мечот со кој ја заврши серијата со конечен триумф од 4:2 во победи и се пласира во финалето, а на шега љубителите на НБА-лигата велат дека Беверли му памти на Пол за трампата од 2017 година.
Пред четири лета, Беверли и уште шестмина кошаркари на Хјустон рокитс заминаа во Лос Анџелес клиперс во замена за Крис Пол.
Феникс по вторпат по 1993 година ќе игра финале во НБА-лигата, прво за Крис Пол во кариерата. Сонцата пред 28 години загубија со 4:2 од Чикаго булс, па сега ќе имаат втора шанса за сефте титула во најсилната лига на светот.
Во финалето ривал ќе им биде подобриот тим од плејоф-серијата меѓу Милвоки бакс и Атланта хоукс, каде што момментно резултатот е 2:2 во победи.
