Жозе Мурињо повеќе не е тренер на турскиот гигант Фенербахче. Ова утрово го соопштија челниците на клубот од Истанбул, а е реакција по новото разочарување, неуспехот да се пласираат во групната фаза од Лига на шампиони.
„Се разделивме со Жозе Мурињо, кој е менаџер на нашиот професионален фудбалски тим од сезоната 2024-2025. Му благодариме за неговите напори за нашиот тим и му посакуваме успех во неговата понатамошна кариера“, стои во соопштението од Фенербахче.
Мурињо го предводеше Фенербахче на 62 меча и имаше биланс од 37 победи, 14 нерешени и 11 порази. Иако целта беше Фенербахче да ја прекине доминацијата на Галатасарај во првенството, тоа не се случи и Фенер остана зад својот најголем ривал. Турскиот гигант немаше ниту некои поголеми успеси во Европа, па откако во средата не успеа да се пласира во групната фаза од ЛШ, стигна оваа одлука од челниците на Фенербахче.
За предвремениот раскин на договорот, Мурињо од Фенербахче ќе добие 15 милиони евра надокнада.
