Жозе Мурињо би можел да го наследи Рафаел Бенитес на клупата на Њукасл. Оваа информација одекна како бомба во британските медиуми, бидејќи името на „специјалниот“ се поврзуваше со други клубови кои беа „фаворити“ да го донесат како шеф на стручниот штаб.
Мурињо е без работа од декември, кога доби отказ од Манчестер јунајтед. Тој чека добра понуда и вистински проект за него, сака предизвици, и би можел да заврши на „Сент Џејмс парк“ во северниот дел на Англија. Њукасл наскоро добива нов сопственик, тоа е шеикот кој е братучед на газдата на Манчестер сити. Новиот газда на „чавките“ повеќе би сакал на клупата да го види Мурињо, отколку Бенитес.
Познато е дека Мурињо го симпатизира Њукасл, најмногу поради Боби Робсон на кого му беше помошник во Барселона и Порто, и атмосферата која ја создаваат навивачите на стадионот. Моментната ситуација во Њукасл е слична како кај Челзи пред клубот да го купи Роман Абрамович, па Мурињо има искуство со градење силен тим кога зад него стои моќен спонзор.
