Европскиот и англиски шампион Манчестер сити ја прифати понудата на Ал-Наср за дефанзивецот Ајмерик Лапорт, објави новинарот на „Атлетик“, Дејвид Орнштајн.
Шпанскиот репрезентативец треба да ја донесе конечната одлука дали ќе се пресели во Саудиска Арабија или ќе остане во Манчестер сити, каде што минатата сезона го загуби местото во првиот тим. Лапорт поради повреди, одигра само 12 натпревари во сезоната во која Граѓаните ја освоија тројната круна, победија во Лигата на шампионите, ФА купот и во Премиер лигата.
Летово Манчестер сити го ангажира Хрватот Јошко Гвардиол, за кого плати 90 милиони евра, кој игра на истата позиција како и Лапорт, со што шансите Шпанецот да биде стандарден оваа сезона се минимални.
https://twitter.com/DeadlineDayLive/status/1691704466418905192?s=20
За да се реализира трансферот на Лапорт во Ал-Наср, зелено светло треба да даде и саудискиот инвестициски фонд, кој е сопственик на тимот, како и на другите три најголеми тима во Саудиска Арабија. За очекување е ако Лапорт даде зелено светло, тогаш да биде одобрен трансферот.
Ал-Наср летово ги донесе Садио Мане, Марцело Брозовиќ, Алекс Телеш, Секо Фофана, а во јануари потпиша со Кристијано Роналдо за неверојатни 200 милиони евра по сезона.
