Откако вчера Реал Мадрид го претрпе првиот овосезонски пораз, иста судбина вечерва ги снајде и ЦСКА Москва. Рускиот гигант загуби на гостувањето кај Будуќност со минимални 93:92.
Сензационалниот меч во Подгорица се подели во две сценарија. Откако првите два периоди припаднаа на гостите, кошаркарите на Будуќност во вториот дел успеаја да надохнадат 17 поени негатива, а до комплетен пресврт и само втора победа сезонава стигнаа во последните моменти од мечот.
ЦСКА го имаше резултатот во своја корист на помалку од четири минути до крајот, а целиот труд им пропадна во вода на пет секунди до последниот свиреж. Будуќност во својот последен напад дури по третиот обид успеа да поведе со 93:92, а Хигинс го промаши шутот за евентуална победа на ЦСКА.
Кларк и Гордиќ го предводеа домаќинот со 18, односно 17 поени. ЦСКА не го избегна првиот пораз во Евролигата, и покрај 19-те поени на Де Коло.
Басконија го совлада тимот на Панатинаикос со конечни 86:77 и така ја прекина серијата од три порази во низа.
