Србите Младен Крстајиќ и Милиќ Чурчиќ се главни кандидати за преземање на селекторската функција во националниот тим на Казахстан.
Казахстанците на 13-ти октомври гостуваат во Скопје во меч од квалификациите за СП 2026, а три дена порано го пречекуваат Лихтенштајн.
Со Крстајиќ немаме убави спомени, пред три години ни дојде како селектор на Бугарија и тој меч заврши 0-1.
Казахстан го замени Али Алиев по дебаклот од 0-6 на гости против Белгија.
Портпаролот на Фудбалската федерација на Казахстан, Џермухамед Маулен, беше гостин во подкаст, и откри дека имало разговори со агенти од Србија и дека меѓу понудените тренери е и поранешниот селектор на Србија и Бугарија, Крстајиќ.
„Вчера разговарав со фудбалски агенти од Србија. Ги разгледавме критериумите, бараме тренерот да бил селектор и да биде под 55 години, па ни ги предложија Младен Крстајиќ и Милиќ Чурчиќ. Чурчиќ добро го познава казахстанскиот фудбал, зборува англиски, ги знае напамет играчите како Оразов, Асранкулов, Чесноков… Крстајиќ е одличен кандидат. Неговата плата е 300.000 долари годишно“ – откри Маулен.
