Реал Мадрид на утрешниот меч од Лигата на шампионите против Наполи нема да смета на осуммина фудбалери, а меѓу нив и Лука Модриќ, кој се повреди против Кадис, но повредата не е сериозна и Хрватот може да се врати викендов на домашниот меч против Гранада или после тоа на пресметката со Бетис во Севилја на 9 декември.
Тренерот Карло Анчелоти периодов има големи проблеми околу составувањето на тимот, а особено проблем е тенката клупа на која има доста младинци. Така ќе биде и утре, но Анчелоти не кука.
„Мислам дека премногу се зборува за оние кои се повредени и не може да помогнат. Според мене, тоа е непочитување кон оние што се здрави и играат. Сакам да зборуваме за тие што ќе играат“, рече Анчелоти на денешната прес-конференција.
„Сакам да го победиме Наполи, но не од некаков реванш или одмазднички причини. Го сакам и тој клуб како и сите други мои поранешни клубови“, додаде Анчелоти.
Интересен беше делот и околу иднината на Италијанецот на клупата на Кралскиот клуб.
„Дали ќе останам во Реал и следната сезона? Ќе ти дадам шанса да ми поставиш и друго прашање“, му кажа Дон Карло на новинарот, а потоа на шега рече дека со Даниел Карвахал се „договориле“ да останат во Реал до 2030 година.
