Рафаел Надал синоќа мораше да игра речиси до два часот по полноќ за да се избори за место во полуфиналето на Ролан Гарос. Шпанскиот тенисер со 3:0 во сетови го победи Јаник Синер од Италија и се избори за место меѓу најдобрите четворица на гренслемот во Париз.
За Надал ова ќе биде 13-то полуфинале на Ролан Гарос. Во претходните 12 сезони кога играл во полуфиналето, секогаш го освојувал турнирот, па не случајно е рекордер со 12 трофеи во Париз. Триумфот над Синер беше 98-ми за Шпанецот на Ролан Гарос во точно 100 дуели.
Следен ривал на Надал е Диего Шварцман. Последен пат овие двајца играа само пред две неделни, кога Аргентинецот го изненади Надал и го победи на Мастерсот во Рим. Сепак, ако се гледа вкупниот биланс на меѓусебни средби, Надал има девет победи и само тој кикс од Рим.
За Надал ова е 34-то полуфинале на гренслем и пред него се само Новак Ѓоковиќ со 37 полуфиналиња и Роџер Федерер со рекордни 46 полуфиналиња на гренслем-турнири. Ако Надал успее да го освои Ролан Гарос, ќе стигне до 20-ти трофеј на гренслемовите и ќе го израмни рекородот на Федерер.