Мартин Одегард ќе може на раат да игра за Реал Сосиедад вечерва од 22 часот против својот клуб Реал Мадрид во дербито на 30. коло во Ла Лига, откако одлучи и дефинитивно да игра уште една сезона како позајмен фудбалер во клубот од Сан Себастијан.
Норвежанецот потпиша договор со Реал Мадрид во 2015 година и за кралскиот клуб одигра само еден меч. Беше позајмен во Херенвен и Витезе во Холандија, а потоа лани замина на нова позајмица, токму на „Аноета“ кај Реал Сосиедад.
За клубот од Баскија игра одлично и го покажа раскошниот талент токму и на дуелот со Реал Мадрид на „Сантијаго Бернабеу“ во четвртфиналето на кралскиот куп.
Сосиедад славеше изненадувачка победа од 4:3 во Мадрид и го елиминира фаворитот, а Одегард блескаше и го постигна првиот гол на мечот. И вечерва речиси сигурно ќе биде стартер во новото дерби на тимот во кој игра како позајмен фудбалер и клубот чиј член е се уште официјално.
