Искусниот француски дефанзивец Рафаел Варан, кариерата ќе ја продолжи во новиот италијански прволигаш Комо.
Варан кој се прослави играјќи за Реал Мадрид каде освои четири титули во Лигата на шампионите, по заминувањето од Кралскиот клуб замина во Манчестер јунајтед, од каде се сели во малиот Комо. Договорот на Варан е со важност од две сезони, со можност за продолжување за уште една.
Трансферот на Варан во Комо беше на инсистирање на тренерот Сеск Фабрегас. Интересно е дека Фабрегас има играно против Варан на Ел Класико, кога Каталонецот настапуваше за Барселона, а Варан за Реал.
„На почетокот бев љубопитен да дознаам за проектот на Комо. И тогаш веднаш видов дека е посебен и различен од сите други што ми беа понудени. Колку повеќе учев за проектот, толку тој стануваше поинтересен, давајќи ми поинаква перспектива за тоа што сакав да работам. Имам големо искуство играјќи на врвно ниво, па сега можам да го споделам тоа знаење и да му помогнам на клубот да се зацврсти. Повторно се среќавам со Сеск, но овојпат не како противник. Ми се допаѓа неговата филозофија на игра и неговата страст за фудбалот. Кога разговаравме, беше лесно да се разбереме, па се надевам дека ќе имаме многу позитивни резултати“, изјави Варан.
