Напаѓачот на Наполи, Виктор Осимен, најверојатно ќе ја продолжи кариерата во Саудиска Арабија ова лето, тврди трансферниот експерт Дејвид Орнстајн од „Атлетик“.
Нигериецот беше клучен за освојувањето на титулата на Наполи во 2023 година, но потоа влезе во конфликт со управата поради желбата да го напушти клубот. Минатото лето не влезе во плановите на новиот тренер Антонио Конте и по неколку неуспешни обиди за трансфер, заврши на позајмица во Галатасарај.
Во турскиот клуб Осимен продолжи со одличните настапи, постигнувајќи 20 гола во 23 натпревари во домашното првенство, уште шест во седум натпревари во Лигата на Европа и два погодока во Купот на Турција.
„Изгледа постои консензус меѓу клубовите од Премиер лигата дека најверојатна дестинација за Осимен ова лето ќе биде Саудиска Арабија“, изјави Орнстајн.
Оваа информација доаѓа изненадувачки, имајќи предвид дека Осимен беше поврзуван со неколку европски гиганти, вклучувајќи ги Манчестер јунајтед, Арсенал и Челзи. Медиумите во Англија тврдат дека ова лето тој ќе има откупна клаузула од околу 65 милиони евра.
Клубовите од Саудиска Арабија не штедат пари и веќе упатија баснословна понуда за да го доведат Виктор Осимен.
