Втората најголема спортска катастрофа се случи изминатиов викенд во Индонезија. По завршување на фудбалското дерби на стадионот „Канјурухан Маланг“ меѓу Арема и Персебаја, започнаа нереди предизвикани од домашните навивачи, а на крајот билансот е над 130 загинати.
Домашните навивачи беа гневни поради поразот на нивниот тим од 2:3, голем дел од нив влегоа на теренот и се случи хаос. Реагираше полицијата, која пушти и солзавец, по што се настана стампедо и трагедијата едноставно не можеше да се спречи.
По трагедијата беше спроведена голема истрага, а заклучокот е дека главна причина поради која се случи толку голема трагедија е доцнењето да се отклучат капиите на стадионот за да може гледачите безбедно да излезат.
„Вратите на стадионот требало да бидат отворени, но, за жал, тие биле заклучени“, вели шефот на Дисциплинската комисија, Ервинг Тобинг.
Поради недостаток на редари, само неколкумина луѓе имало кои требале да ги отворат сите капии од стадионот, но немале доволно време да стигнат. Навивачите уплашени од фрлениот солзавец почнале да бегаат кон вратите за да излезат надвор од стадионот, но наишле на заклучени излези.
Портпаролот на Федерацијата на Индонезија објаснува дека вратите на стадионот требало да бидат отклучени 10 минути пред крајот на мечот, но на саботниот меч неколку врати биле заклучени дури седум минути откако завршил дуелот. Најголемиот дел од навивачите загинаа во стампедото од гушење.
Освен заклучените врати, секако дека една од главните причини за оваа смртоносна катастрофа е и фактот дека полицијата пуштила солзавец за да ги спречи навивачите да влезат на теренот, а солзавец на фудбалски меч е со закон забрането според ФИФА.
За тоа како изгледаше трагедијата пренесена преку фотографии погледнете ТУКА.
