Новинарот на еден од највлијателните спортски магазини на светот „Спортс илустрејтед“, Џон Вертхајм, тврди дека Саудијците сега подготвуваат револуција во тенисот.
Според него, четирите гранслем-турнири, деветте актуелни мастерс 1000 турнири и десеттиот, кој би требало да се одржува во Ријад, Саудиска Арабија, би се одвоиле од АТП и биле под капата на Саудискиот државен инвестициски фонд (ПИФ).
Со ова би се направила тениска „суперлига“, додека на АТП и ВТА би им останале помалите турнири, сериите 500 и 250, челинџерите и завршниот Мастерс.
Теоретски оваа идеја е возможна бидејќи сопственици на гранслем-турнирите и мастерсите од серијата 1000 се поединци, менаџерски агенции и национални тениски федерации и според новинарот, веќе се започнати преговори за купување на турнирите.
Вертхајм смета дека Саудијците можат да понудат огромна сума пари и да ги купат најголемите тениски турнири.
