Барселона со една добра четвртина успеа да дојде до победа над Партизан со 87-80. „Каталонците“ сега се искачија на посакуваната шестта позиција, која носи пласман директно во четвртфиналето.
Мечот во „Блауграна“ започна одлично за Партизан. Белградските „црно-бели“ отворија со 0-8, а брзо потоа имаа и 3-13, предност која ја имаа уште трипати во првата четвртина, пред да заминат на првата мини-пауза со водство од 25-32.
Но, тогаш Барселона се разбуди и во вториот период буквално растури противникот. „Каталонците“ ја добија четвртината со 29-9 и ја најавија победата. Предноста од 13 поени на полувремето, порасна на +16 на стартот од третиот период, па иако во финишот имаше мала драма, сепак кошаркарите на Барселона беа присебни и заслужено победија.
Олимпијакос ја доби драмата во грчкото дерби против Панатинаикос и победи со 76-74, додека Баерн Минхен доживеа изненадувачки пораз на домашен терен од Анадолу Ефес со 92-97.
