Македонскиот ракометен првак Еурофарм Пелистер го претрпе третиот пораз во четвртото коло од групната фаза во Лига на шампиони. Битолчани немаа сили да парираат на гостувањето кај Висла Плоцк и загубија убедливо со 36:25.
Пелистер играше одлично во почетните 15-тина минути, па дури имаше и водство од 9:8. Потоа следуваше серија од 3:0 за Висла, а Пелистер држеше ритам до 11:10. Полјаците поведоа со 14:10 и предноста од четири гола ја задржаа и на полувреме кога беше 18:14.
Во вториот дел играчите на Пелистер едноставно не можеа да парираат на домаќините. Во првите неколку минути од вториот дел Висла Плоцк поведе со 23:16 и уште тогаш беше јасно дека гостите нема шанси да направат изненадување.
Висла прв пат поведе со 10 разлика кога беше 30:20, а во еден момент предноста беше и 12 голови (34:22). Во победничкиот тим најефикасен беше Ричардсон со 8 погодоци, а Шпанецот Семуел постигна пет голови. Во редовите на Пелистер најефикасен беше Дејан Манасков со 7 погодоци, а 4 голови постигна Павле Атанасијевиќ. Голманот Никола Митревски имаше девет одбрани.
