Денешните шест натпревари од Првата македонска фудбалска лига се играа без публика, а горе-долу донесоа очекувани резултати.
Шкендија со новите три бода малку се одвои и сега е осамена на врвот, но три тима по два бода помалку од неа. Работнички со два атрактивни гола на албански интернационалци триумфираше во Струмица.
Вардар на Арената во Скопје прими гол од убедливо најнеефикасната екипа во лигата (кавадарчани немаа дадено гол уште од 27-ми октомври), но сепак избегна пораз и освои бод во дуелот со „фенерџијата“ Тиквеш.
Немаше гол само во Маџари, каде што дерби играа Гостивар и Силекс. Гостиварци во последните 15-тина минути играа со човек помалку.
Важни победи извојуваа Шкупи и Пелистер, а дополнителните детални проверки треба да покажат дали голот на битолчани за победа против Беса беше постигнат со рака, но како и да е, голот беше признат и домашните славеа.
РЕЗУЛТАТИ: Брера Струмица – Работнички 1-3, Гостивар – Силекс 0-0, Пелистер – Беса 1-0, Шкупи – Струга 3-1, Вардар – Тиквеш 1-1, Воска спорт – Шкендија 0-1.
ТАБЕЛА: Шкендија 36 бодови, Силекс, Гостивар и Работнички по 34, Струга 29, Шкупи, Пелистер и Брера по 19, Беса и Вардар по 13, Воска 12, Тиквеш 11.
