Македонската кошарка загуби уште едно големо име. Поранешниот кошаркар и легенда на Пелистер, Зоран Петковски, почина на само 47-годишна возраст. Тажната вест ја потврди клубот од Битола, кој преку соопштение изрази длабоко сочувство до неговото семејство.
Петковски ги направи првите кошаркарски чекори токму во Пелистер, каде што ја започна и изгради својата кариера. Тој беше дел од младинските селекции на Македонија, а во текот на својата играчка етапа ги носеше дресовите на Куманово, Вардар, МЗТ Скопје и уште неколку домашни екипи.
По завршувањето на играчката кариера, Петковски прејде во тренерските води и на почетокот застана токму на кормилото на својот матичен клуб Пелистер. Под негово водство тимот се врати во елитното друштво, што остана запишано како еден од најубавите моменти во неговата кариера.
Во последните години, тој беше и член на управата, продолжувајќи да му служи на клубот кој му беше повеќе од дом.
Зоран Петковски ќе остане запаметен како еден од најдобрите кошаркари од Битола, човек кој со својата љубов кон играта и клубот остави трага што нема да избледи.
