Повеќе од две децении Лионел Меси испишува фудбалска историја со своите настапи. Аргентинецот кој стана легенда со осум освоени Златни топки и уште еден куп други нестварни достигнувања, пред 20 години имаше разочарувачко деби во националниот тим.
На 17 август 2005 година, Меси како 18-годишник доби шанса да дебитира за репрезентацијата на Аргентина, и тоа на пријателски меч против Унгарија. Меси влезе на местото на Лисандро Лопес во 64-тата минута, а само 40 секунди подоцна доби директен црвен картон. Тогаш тинејџерот Меси тргна во соло пробив, а еден од домашните иргачи го влечеше за дресот. Меси го удри со раката, судијата тоа го виде и веднаш го исклучи младиот Меси.
Тој меч како да беше лекција за Лео. Сега, 20 години подоцна, Меси има одиграно 193 натпревари во аргентинската репрезентација, а има постигнато 112 голови. Меси со Аргентина се радуваше на титула на Светско првенство (2022 година), како и на два трофеи на Копа Америка (2021 и 2024) и еден пехар на Финалисима (2022).
