Поранешниот фудбалер кој сега работи како тренер, Самир Топлак, на социјалните мрежи објави една фотографија која стана хит.
Станува збор за фотографија направена во Берлин пред 18 години за време на Светското првенство, а на неа како навивач е и Златко Далиќ. Сега Далиќ е селектор на Хрватска и попладнево од 18 часот во Берлин ќе го води својот тим на дуелот со Шпанија во првото коло од Европското првенство во Германија.
Во 2006 година кога беше тренер на клубот Вартекс, Далиќ ја гледал Хрватска на средбата со Бразил како фан и тоа од најгорниот ред покрај семафорот на Олимпискиот стадион во Берлин, а сега ќе биде покрај теренот.
Под водство на Далиќ, Хрватите по еднаш беа втори и трети на Светско првенство, се надеваат и на трето чудо и прв поголем успех и на европските првенства. Првиот чекор треба да им биде да победат или барем да одиграат нерешено со силната, но не и непобедлива Шпанија.
