Ливерпул игра сезона за памтење. Во досегашните 25 одиграни меча гигантот од „Енфилд роуд“ има 24 победи и само едно реми и досега освои 73 од можните 75 бодови. Ливерпул сега има 22 бода повеќе од второпласираниот Манчестер сити и според пресметките, доколку тимот на Јирген Клоп ги добие следните шест меча, и официјално ќе биде нов првак во Англија.
Лидерот во Премиер лигата моментно има 42 меча без пораз и е само на седум меча до стигнување на рекордот на Арсенал од сезоната 2003/04 и 2004/05, кога Топчиите имаа 49 средби без пораз. Речиси и не е спорно дека Ливерпул ќе стигне до 100 бода до крајот на сезоната, но прашање е со колку бодови ќе ја заврши сезоната.
Стручњаци кои работат на создавање на популарната игра „Фудбал менаџер 2020“ решија да направат пресметка за тоа како ќе заврши сезоната во Англија. По направените пресметки од базата на податоци, моменталната ситуација на табелата, формата на екипите и засилувањата кои ги добија, беше направена пресметка која вели дека оваа сезона ќе биде историска.
Во играта е забележано дека Ливерпул ќе го добие градското дерби против Евертон на „Гудисон парк“ со 2:1, ќе го победи и Арсенал со 1:0 на гости, а на „Етихад“ во Манчестер ќе остане непоразен и ќе одигра 1:1. Според пресметките, Ливерпул на крајот ќе заврши со 36 победи и само две нерешени и ќе заврши со неверојатни 110 бодови, дури 30 пред второпласираниот Манчестер сити.
Доколку се остварат овие резултати, Ливерпул ќе ги надмине рекордите на Арсенал и Ливерпул. Топчиите веќе нема да бидат клубот со најмногу мечеви без пораз, а Сити нема да биде клубот кој стана првак со најмногу освоени бодови.
„Фудбал менаџер 2020“ ги објави сите можни резултати на Ливерпул до крајот на сезоната во Премиер лигата. Во следното коло Ливерпул ќе гостува кај Норвич и според пресметките, фаворитот ќе победи со 3:1 на ова гостување.
