Во пресрет на гостувањето на Наполи кај Брага, претседателот на италијанскиот првак, Аурелио де Лаурентис, има зачестени телефонски разговори со тренерот Руди Гарсија и се бараат резултати веднаш.
Првиот човек на Наполи не е задоволен од игрите и резултатите на Наполи во Серија А и од Гарсија побарал да го применува системот на екстренерот Лучано Спалети. Од важните играчи на Наполи кои ја освоија титулата, летово си замина само Кореецот Ким и за Де Лаурентис е несфатливо зошто тимот кој е речиси со ист состав, не игра како во минатата сезона.
На мечот со Џенова, на кој Наполи одвај освои бод, јавно незадоволство изрази ѕвездата Кварацхелија, кој беше заменет, па фановите му се нафрлија на тренерот Гарсија. Нашиот Елиф Елмас играше само во првото полувреме, и тоа на позиција на која не се чувствува најдобро.
„Шампионскиот систем на Наполи е променет од Гарсија. Лоботка е непрепознатлив, Квара исто така имаше негова нелогична замена против Џенова. Елмас гледаме дека игра добро за репрезентацијата, а кај Гарсија не игра на вистинската позиција. Де Лаурентис е во право што се лути, го гледа скршениот Елмас по вториот гол на Џенова“, коментира италијанскиот новинар Антонио Корбо од весникот „Република“.
