Претседателот на Ла Лига, Хавиер Тебас, одговори на најновите критики од Реал Мадрид, откако тренерот Карло Анчелоти се пожали на распоредот на натпреварите. Анчелоти изјави дека неговиот тим повеќе нема да игра ако нема најмалку 72 часа одмор помеѓу натпреварите.
Тебас ја коментираше ситуацијата околу закажувањето на дуелот против Леганес, кој се игра пред реваншот од полуфиналето на Купот на Кралот против Реал Сосиедад.
„Карло, сигурен сум дека Емилио ти кажал дека Ла Лига го закажа натпреварот со Леганес во сабота од 16:15 часот за да имате повеќе одмор пред полуфиналето против Реал Сосиедад. Но, Емилио побара од директорот на натпреварувањето на Ла Лига да го премести во 21:00 часот – веројатно со ваше знаење и одобрение – во корист на оние што се враќаат од репрезентативни обврски. Сега имаме помалку од 72 часа меѓу крајот на саботниот натпревар и почетокот на полуфиналето во вторник! Нека најдобриот се пласира во финалето! Поздрав“, напиша Тебас на социјалните мрежи.
