Рано утрово во Њујорк заврши ФИДЕ Светското првенство во брзопотезен шах на исклучително драматичен и досега невиден начин. Во дуелот меѓу седумкратниот и актуелен светски првак Магнус Карлсен и поранешниот двократен предизвикувач во класичен шах, Јан Непомњашчи, резултатот беше изедначен 3,5-3,5, по што титулата беше поделена.
Во четирите партии од главниот меч, Карлсен почна доминантно, поведувајќи со 2-0. Но, Непомњашчи направи сензационално враќање, израмнувајќи на 2-2 и изборувајќи доигрување до прва победа. Во доигрувањето, ниту првата, ниту втората, ниту третата партија не донесоа победник. Тогаш Карлсен застана и предложи поделба на титулата. По кратко размислување, Непомњашчи се согласи.
Двајцата играчи се обратија до главниот судија, објаснувајќи дека се преморени и дека натамошното играње би резултирало со победа поради грешки од исцрпеност.
„Доколку продолжевме, која било страна ќе победеше поради замор, што би било сурово“, изјави Карлсен.
Според правилата на натпреварот, одлуката за вакви околности ја донесе претседателот на ФИДЕ, Аркадиј Дворкович, кој го прифати предлогот. Така, титулата беше поделена без доделување сребрен медал. Ова е осма титула за Карлсен, додека за Непомњашчи ова е прв светски наслов во брзопотезен шах.
