Ерик Пулгар со еврогол од слободен удар се обиде да го нокаутира Милан, но Росонерите имаа победнички гард и славеа со 3:2 во одличен меч на „Артемио Франки“ против Фиорентина.
Имаше многу шанси, пет голови, еврогол на Пулгар и два пресврти во еден од најдобрите натпревари во Серија А сезонава, а голеадата ја најави Златан Ибрахимовиќ со погодок во деветтата минута.
Само 8 минути подоцна Пулгар гаѓаше мајсторски од слободен удар и успеа да го вплетка и Донарума во мрежата заедно со топката.
Првиот пресврт на мечот го донесе Франк Рибери, со гол во 51. минута, но Милан покажа победнички карактер и славеше многу важна победа со головите на Брахим Дијас и на Хакан Чалханоглу.
Роснерите останаа на второто место на табелата со 59 бода, шест помалку од лидерот Интер, но со еден меч повеќе. Фиорентина е на 14. позиција со 29 бода.
