Работнички ја отвори сезоната во Купот со спектакуларна победа, совладувајќи го тимот на Карбинци со неверојатни 0-16. Клубот од Дебар Маало беше единствен прволигаш без постигнат гол во првите три кола од ПМФЛ, но даде и премногу на овој куп-натпревар.
Ова е втората најубедлива победа во историјата на натпреварувањето во Купот, надминувајќи го рекордот на Вардар (16-1 против Пролетер), а единствено пред Работнички останува историскиот резултат 22-0 на Брегалница против Ново Црнилиште.
На полувреме во Карбинци веќе беше 0-9, а во вториот дел Романтичарите додадоа уште седум погодоци. Во листата на стрелци се запишаа Николовски (2), Далеј (2), Демири, Мециновиќ, Кадриу, Асани (2), Ангелов, Елези, Бошњаков, Жаку (2) и Хоџа (2).
Со убедлив настап стартуваше и Брегалница, која на гостувањето кај Победа Валандово славеше со 0-6. Силекс исто така беше убедлив и победи против Евротип со 1-7. Сепак, уште поефикасни беа фудбалерите на Македонија ЃП кои славеа против Љуботен со 0-14. Тие формално беа гости, иако мечот се играше на стадионот во Ѓорче Петров.
Од прволигашите елиминирана е Брера, која на пенали (5-3) загуби од Охрид откако во регуларниот тек мечот заврши 1-1. И Башкими го заврши настапот во Купот откако на домашен терен загуби од Детонит Плачковица со 1-4.
