Дефанзивниот играч за врска на фудбалската репрезентација на Англија, Деклан Рајс, објасни зошто не го прослави својот гол против Република Ирска во првото коло од Лигата на нации.
Натпреварот заврши со 2-0 за Англичаните, а двата гола ги постигнаа фудбалери (Рајс и Џек Грилиш) кои имаат ирско потекло и во минатото играа за Ирска.
Рајс има три настапи и за А тимот на Република Ирска, а во 2019 година доби дозвола да почне да игра за Англија.
„Ако го славев погодокот, би било непочитување кон мене и моите предци. Моите баба и дедо, и целото семејство на татко ми се Ирци. За жал починати се, веќе не се тука, не би било во ред да го славев голот. Поминав одлично време играјќи за Ирска во првиот тим и за играчи до 19 и до 21 година. Ова се прекрасни спомени кои живеат со мене. Немам ниту еден лош збор да кажам. Им посакувам се најдобро“, изјави Рајс.
За разлика од него, Грилиш го прослави голот и наиде на остри реакции во Ирска.
